БҮС НУТГИЙН БОЛОН ОЛОН УЛСЫН ТӨГӨЛДӨР ХУУРЫН ТЭМЦЭЭНҮҮДЭД АМЖИЛТ ГАРГАЖ БУЙ, АНУ-ЫН САН ФРАНЦИСКО ХОТОД ОРШИН СУУГАА АВЬЯАСЛАГ МОНГОЛ СУРАГЧДЫГ ХҮЛЭЭН АВЧ УУЛЗАВ

Ерөнхий консул Б.Мөнхбаатар 2025 оны 8 дугаар сарын 24-ний өдөр Plumrose Piano Studio хөгжмийн сургуулийн төгөлдөр хуурын багш Батнасангийн Ичинхорлоогийн сурагч, авьяаслаг монгол хүүхдүүдийг Ерөнхий консулын газарт хүлээн авч уулзав.

Ганцогтын Сонор (9 настай), Баттогтохын Учрал (9 настай), Батзаяагийн Энгүүн (11 настай), Батзаяагийн Цэлмүүн (11 настай), Соронзонболдын Сондор (11 настай) нар нь “San Francisco International Piano Competition” болон олон улсын төгөлдөр хуурын тэмцээнүүдэд амжилттай оролцож, Нью-Йорк хотын алдарт Carnegie Hall-ийн тайзнаа уригдан, эх орноо төлөөлж уран бүтээлээ толилуулсан юм.

Ерөнхий консул Б.Мөнхбаатар эдгээр сурагчдын авьяас, хичээл зүтгэлийг үнэлж, Монгол Улсынхаа нэрийг олон улсын тавцанд гаргаж байгааг нь сайшаан тэмдэглэж, Ерөнхий консулын газрын нэрийн өмнөөс өргөмжлөл гардуулав.

Б.Ичинхорлоо багшийг Монголын сонгодог урлагийг олон улсад толилуулж эх орноо сурталчлан, соёлын салбарыг хөгжүүлэхэд чамгүй хувь нэмэр оруулж буйг нь үнэлж, Соёлын сайд Ч.Ундрамын тушаалаар Соёлын яамны “Жуух бичиг”-ээр шагнасныг энэхүү завшааныг тохиолдуулан гардуулав. Б.Ичинхорлоо нь одоогоор Сан Франциск хотод багшилж, олон улсын уралдаан тэмцээнд амжилттай оролцож буй шавь нарыг бэлтгэхийн зэрэгцээ хөгжмийн ур чадвар, уран сайхны төгөлдөржилтийг хөгжүүлэн ажиллаж байна. Оюуны болон уран сайхны хөгжлийг дэмжих, академик амжилтад хүргэх, дэлхий нийтийн хөгжим боловсролыг түгээх зорилгыг урдаа тавин ажиллаж буй төгөлдөр хуурч, багш юм.

Шагнал хүртсэн авьяаслаг хүүхдүүд цаашдын сурлагад нь амжилт хүсээд, Б.Ичинхорлоо багшид залуу ирээдүйн урлаг соёлын хөгжилд оруулж буй хувь нэмрийнх нь төлөө халуун баяр хүргэе!

Б.Ичинхорлоо багштай холбоо барих цахим хаяг: [email protected]